أعراض التعب النفسي وكيف تتخلص منها؟

أعراض التعب النفسي وكيف تتخلص منها؟

حاسس انك تعبان نفسيا والدنيا جاية عليك؟ عندك اعراض كتير وقلقان وفاكرها امراض جسدية؟ دي اعراض التعب النفسي واثر الاكتئاب عليك:

اولا- المزاج المتغيير: التعب النفسي بيأثر علي صحة العقل والجسد والعواطف وبيخليك تفقد الشغف والرغبة في انك تعمل اي حاجة مفيدة واعراض التعب النفسي المرتبطة بالعاطفة هي:

1-القلق.

2-الكسل والاهمال.

3-الاكتئاب.

4-معندكش طاقة تعمل حاجة.

5-ردود فعل سريعة وطبع متغيير وشديد.

6-عصبية وتوتر دائم.

7-البكاء بدون اسباب محددة.

ثانيا- مفيش عندك قدرة علي التركيز ولا التفكير: العلماء اكتشفوا ان التعب النفسي و الاكتئاب بيأثر علي مناطق الادراك والتركيز في المخ ودي اعراض التعب النفسي واثرها علي عقلك:

1-فقدان التركيز بشكل مستمر.

2-النسيان و التوهان.

3-مش قادر تخطط ولا تنظم اي حاجة في حياتك.

4-علطول تفكيرك مشتت.

ثالثا: اتضرابات وقلق في النوم: التعب النفسي مش بس بيأثر علي العاطفة والمخ…بالعكس ده بيأثر علي كل اركان حياتك واهمها للاسف قدرتك علي النوم.

العلماء وجدوا ان الانسان المكتئب او التعبان نفسيا مش بينام طبيعي زي باقي الناس وانه بيفقد سلامه وقدرته علي النوم بشكل مستمر, وتبقي الناس نايمة وهو صاحي والعكس ودايما عنده كسل وخمول واحساس بالفشل وعنده احساس بالتعب والنوم طول النهار بينما بليل مفيش نوم طبيعي.

رابعا: التعب الجسدي: التعب النفسي مرتبط بالتعب الجسدي ارتباط مباشر وشديد يعني لما حد يقولك متفقعش مرارتي او متوجعش قلبي معاك اسمع الكلام, ودي اعراض التعب الجسدي اللي سببه التعب النفسي:

1- احساس بالتعب في جسمك كله.

2-صداع متقطع.

3-سدة النفس.

4-الم وتشنج في العضلات.

5-صعوبة الهضم وهيجان القولون اللعين.

6-ضربات القلب غير منتظمة.

زيادة او نقصان في الوزن بسرعة.

خامسا: اثر التعب النفسي علي حياتك العملية وشغلك:

1-بتعمل كل حاجة ببطئ ومن غير هدف.

2-بتغيب كتير عن الشغل ومش طايق تشوف حد.

3-مش عارف تتواصل مع الناس زي الاول.

4-الاهمال وتفويت المواعيد.

5-البعد عن اللقائات والاحتكاك بالناس.

اعراض التعب النفسي عموما واللي لو زادت عن الحدود لازم وحتما تروح لدكتور وفكك بقي من جملة انا مش مجنون عشان اروح لدكتور نفسي, محدش قال انك مجنون بس كل تعب وليه دكتور والتعب النفسي ليه دكتور لو انت مجنون الدكتور مش هينفعك اصلا.

الاعراض اللي تستدعي زيارة الدكتور:

1-ارتفاع ضغط الدم اكتر من مرة وده بيأثر علي القلب ولازم تلحقه.

2-زيادة الوزن بشكل مبالغ فيه.

3-الارق والهبوط.

4-ظهور علامات الشيخوخة.
5-التوتر والاكتئاب المستمر.

ازاي تتجنب بقي التعب النفسي او الاكتئاب وازاي تحد من اثاره عليك حتي لو حصل بالفعل؟ دي نصايح اطباء في علم النفس مع رشة نصايح صغيرة مني ليك بس اعمل بيها ماشي؟

1- ابعد عن الناس او الاماكن اللي بتتعبك نفسيا, فلان ده بيوجع دماغك او يستغلك يبقي اقطع علاقتك بيه…مديرك او زمايلك بيتعبوك نفسيا يبقي خليك بارد معاهم لحد ماتلاقي شغل احسن وسيبهم, المكان الفلاني فيه ناس بتكرهك او تحسدك الخ الخ يبقي متروحش عندهم احسن.

2-تاكل اكل صحي واكل نضيف وعلي رأي المثل مش هيبقي موت وخراب ديار, يعني مش معني ان نفسيتك تعبانة او متضايق شوية تهمل بطنك وجسمك…كرشك مالوش ذنب في تعبك النفسي بس مترميش فيه اكل معفن ولا متعب.

3-الرياضة و انا عارف ان دي حاجة صعبة علينا كمصريين بس معلش تعالي علي نفسك وعلي الاقل اتمشي كل يوم نص ساعة علي الاقل وهتفرقك معاك جدا في صحتك النفسية والجسدية والعقلية كمان.

4-لو انت بتشرب كحوليات او بيرة بلاش منها لانها هتزود تعبك النفسي وهتخليك متوتر وحاد وانت مش ناقص وكمان هتبوظ قدرتك علي النوم…التدخين و المكيفات التانية متقلش خطورة عن الكحول والخمور.
5-حاول تنام اكتر مانت بتفكر وادي لمخك وجسمك فترة راحة من الدنيا واللي فيها…وبلاش قهوة ولا شاي او اي حاجة فيها كافيين قبل النوم.

5-لو عندك هواية زي الرسم او الغناء او الشعر مارسها علي قد ماتقدر وحاول دايما تشغل وقت فراغك بحاجة مفيدة او علي الاقل حاجة متتعبكش نفسيا.
6-كلم الناس اللي بتحبهم واسال عنهم وفضفض معاهم.

7-رفه عن نفسك علي قد ماتقدر, شوف فيلم بتحبه او فيلم جديد, العب لعبة بتحبها, اعملي وجبة بتحبيها, اطلع رحلة للحمام وهكذا.

8-مهم جدا تطلب المساعدة وتشوف دكتور نفسي او اخصائي لو جالك افكار انتحارية بشكل مستمر او مبقيتش قادر تسيطر علي افكارك.

9- واخيرا انصحك تصلي وتقرب من ربنا مش معني كده انك بعيد عن ربنا متفهمنيش غلط, لكن زي مانت لازم تهتم بجسدك ونفسك وعقلك لازم تهتم بروحياتك برضه…وسلامتك يا جميل.